Viti med skuleformidling i Herøy kommune

Etter at Herøy kommune og Stiftinga Viti inngjekk samarbeidsavtale, er skuleformidlinga til elevane i kommunen i gang.

Denne veka er forhistoria tema når Viti vitjar Bergsøy skule, Einedalen skule, Stokksund skule og Nerlandsøy skule med formidlingsopplegget «Forhistoria på rull».

Ved hjelp av ei sju meter lang tidslinje som vert rulla ut på golvet, kopiar av arkeologiske funn, forteljingar og praktiske aktivitetar får elevane bli med på ei reise gjennom forhistoria - frå den siste istida og fram til historisk tid. Det er gjort mange, og svært interessante arkeologiske funn i Herøy, og målet er å gjere elevane kjende med både den lokale og den regionale forhistoria.

«Forhistoria på rull» er det første av fleire tilbod som no blir gjort tilgjengelege gjennom samarbeidet mellom Herøy kommune og Viti. I løpet av skuleåret vil Viti også besøke skulane med to ulike folkedansproduksjonar, i tillegg til museumsbesøk ved Viti sine museum i Ålesund.

Samarbeidet skal bidra til at elevar i Herøy får tilgang til kunst- og kulturopplevingar av høg kvalitet, tett på eigen skulekvardag.