Ny konservator i Stiftinga Viti

Rebecca Giske Bjørge (34) er tilsett som konservator ved avdeling for kunst og design i Viti frå september 2026. Ho skal jobbe med kunnskapsutvikling, dokumentasjon og formidling av gjenreisingsarkitekturen i Ålesund, og av jugendstilarkitektur i ein breiare nasjonal og internasjonal samanheng.

- Jeg gleder meg veldig til å få arbeide med jugendstilen og bygningsvern i en by som betyr så mye for meg personlig. Som arkitekt er jeg opptatt av hvordan historisk arkitektur kan gi identitet, tilhørighet og varige kvaliteter i byene våre. Jeg ser frem til å bidra til å ta vare på denne kulturarven og samtidig gjøre den tilgjengelig og relevant for flere, sier Rebecca Giske Bjørge.

Bjørge kjem opprinneleg frå Ellingsøya og har ein master i arkitektur frå NTNU, med masteroppgåva “Mellom fortid og fremtid - Boligprosjektering i Jugendbyen Ålesund”. Ho har i tillegg studert rettsvitskap ved Universitetet i Bergen. Bjørge kjem flyttande frå Trondheim, der ho mellom anna har vore i praksis hos LINK Arkitektur.

- Rebecca har ein solid fagleg bakgrunn og eit sterkt engasjement for arkitekturhistoria i Ålesund. Vi er glade for å få på plass ein konservator som både kjenner byen godt og som kan bidra til å utvikle ny kunnskap om jugendstilen og gjenreisingsarkitekturen lokalt, og som også kan bidra til at vi når måla våre om fagleg synlegheit nasjonalt og internasjonalt, seier avdelingsdirektør for avdeling for kunst og design i Viti, Benedikte Holen.

Avdeling for kunst og design i Viti består av Jugendstilsenteret og KUBE i Ålesund, Anders Svor-museet i Hornindal og Møbelmuseet i Sykkylven. Museet har eit nasjonalt ansvar for jugendstilen, Anders Svor sin kunst og kunst knytt til Møre og Romsdal. Viti er det konsoliderte regionmuseet på Sunnmøre og er den største kulturarbeidsplassen mellom Bergen og Trondheim.