Elevar designar jakker

Borgund vidaregåande skole designar for Sunnmøre museum

Ungdomsbedrifta «Nådelause nåler» ved VG2 Søm og tekstilhandverk på Borgund vidaregåande skole har dette skuleåret designa og sydd jakker til formidlarane på Sunnmøre museum. Jakkene er inspirerte av plagg frå 1800-talet og tek utgangspunkt i museet sine eigne samlingar.

Torsdag 11. juni kl. 12.00 blir jakkene overleverte til museet under ei markering i Åkre bedehus på Sunnmøre museum.

Gjennom skuleåret har elevane fordjupa seg i drakthistorie og studert gjenstandar frå museet sine tekstilsamlingar.

– Dette har vore eit svært kjekt samarbeid. Å følgje elevane frå idé til ferdig produkt har vore både inspirerande og givande, seier Line Iversen, konservator og tekstilansvarleg i Viti, som har vore rettleiar gjennom prosjektet.